د اوږدې مودې لپاره د هیډفون (ګوشکی) کارول؛ د اورېدلو لپاره جدي ګواښ
سلمااحمدزی- د غوږ، پوزې او ستوني (ENT) ډاکټران او متخصصان د هیډفونونو او ایرفونونو د اوږدې مودې او لوړ غږ کارولو په اړه خبرداری ورکوي. دوی وايي چې دا عادت کولی شي په تدریجي ډول د غوږ په ننۍ برخه کې د اورېدلو حساسې حجرې زیانمنې کړي او په پایله کې د اورېدلو دایمي کمښت رامنځته کړي.
د ښاریانو او متخصصانو په وینا، دا ستونزه د ځوان نسل ترمنځ د غږیزو وسایلو د ډېر استعمال له امله په چټکۍ سره زیاتېږي.
د ویژه روز خبریال د راپور له مخې، که څه هم د هیډفونونو کارول ورځني ژوند اسانه کړی، خو بې پروا استعمال یې روغتیايي خطرونه رامنځته کړي دي.
ډاکټران ټینګار کوي چې کاروونکي باید د غږ کچه په خوندي محدوده کې وساتي او خپلو غوږونو ته د استراحت فرصت ورکړي.
د کابل ښار یو اوسیدونکي، چې نه یې غوښتل نوم یې واخیستل شي، وویل: «د هیډفون ډېر او بې وقفي استعمال غوږ ته زیان رسوي.
که د هیډفون کارولو ته اړ یاست، حتماً یې په ټیټ غږ او د لنډې مودې لپاره وکاروئ که نه نو باید له استعمال څخه یې ډډه وشي.»
محمد حجتي، چې ځان هم د دغو وسایلو له امله له ستونزو سره مخ شوی، د خپلې تجربې په بیانولو سره وویل: «هیډفون د غوږ له حساسو برخو سره مستقیمه اړیکه لري.
کله چې ډېر استعمال کړم، د غوږ په پرده کې د دروندوالي احساس کوم او عادي غږونه په ښه توګه نه شم اورېدلی او د ژر غصه کېدو او عصبي نارامتیا احساس هم راته پیدا کېږي.»
د غوږ او ستوني متخصص، ډاکټر سید نیاز حیدري، ځانګړي ورځې ته وویل: «تر ټولو غوره لاره دا ده چې د هیډفون غږ په ټیټه کچه واورېدل شي او هر ساعت څو دقیقي خپلو غوږونو ته دمه ورکړي.
له دې څخه ډډه وکړي چې هندزفري د اوږدې مودې لپاره په غوږ کې کېږدي.
که د غوږ د دوامدار شور یا وزوز، د اورېدلو د کمښت، درد یا د غوږ د ترشحاتو په څېر نښې تجربه کړئ، حتماً دې د متخصص ډاکټر له خوا معاینه شئ.»
بلخوا، د غوږ او ستوني بله متخصصه ډاکټره تینا ضیایي وویل: «په لوړ غږ او دوامدار ډول د ایرپډونو استعمال، په ځانګړې توګه هغه ایرپډونه چې د غوږ دننه په ژوره برخه کې ځای پر ځای کېږي، نه یوازې د اورېدلو د کمښت او د غوږ د وزوز لامل کېږي، بلکې د غوږ مجرا هم تحریکولی شي او حساسیت رامنځته کولی شي.
له همدې امله، د استعمال د وخت محدودول او د غږ د کچې رعایتول په بشپړه توګه اړین دي او هېڅ شی د روغتیا په اندازه ارزښت نه لري.»
د دغو وسایلو بې رویه استعمال د عامې روغتیا لپاره د نه جبرانېدونکو منفي پایلو لامل کېدای شي او متخصصانو څو ځله په دې برخه کې د عامه پوهاوي پر اړتیا ټینګار کړی دی.
ډاکټران وايي چې کاروونکي د خپلې اورېدنې د روغتیا د ساتنې لپاره تل د غږ کچه په خوندي محدوده کې وساتي او خپلو غوږونو ته د استراحت فرصت ورکړي، څو د غوږ د دننۍ برخې حساسو او نه جبرانېدونکو حجرو ته له زیان رسېدو څخه مخنیوی وشي.
پای
