د افغانستان د صنعت او تجارت وزیر د ایران د سیستان او بلوچستان له والي سره د میلک په پوله لیدنه وکړه
نورالدین عزیزی، د اسلامي امارت د صنعت او تجارت وزیر، نن د یو لوړپوړي پلاوي په مشرۍ د ایران د اسلامي جمهوریت د سیستان او بلوچستان له والي، ښاغلي بیجار سره د میلک په پوله لیدنه او خبرې وکړې.
دا لیدنه د اقتصادي اړیکو د پیاوړتیا، د دوهاړخیز تجارت د پراختیا او د ترانزیتي ظرفیتونو د زیاتوالي په هدف ترسره شوه.
په دې ناسته کې دواړو خواوو د میلک ابریشم د پولي د اوسني تجارتي او ترانزیتي وضعیت ارزونه وکړه او د موجودو خنډونو د لرې کولو او د عملي همکاریو د پراخولو پر اړتیا ټینګار وکړ.
د افغانستان د صنعت او تجارت وزیر، د میلک پوله د افغانستان د سیمه ییزو بازارونو سره د نښلولو لپاره یوه ستراتیژیکه حلقه وبلله او د سوداګرو او تجارتي وسایطو لپاره د لا زیاتو اسانتیاوو پر برابرولو ټینګار وکړ.
د خبرو اصلي محورونه دا وو:
– د نیمروز ولایت او د ایران د سیستان او بلوچستان ترمنځ د ګمرکي اړیکو او بینالولایتي همکاریو پیاوړتیا، د وسایطو د ترخیص د چټکتیا او د تمېدو وخت د کمولو په موخه؛
– د صنعتي، تجارتي او ترانزیتي برخو کې د ګډو پانګونو جذب، په ځانګړي ډول د سرحدي ګډو پروژو په برخه کې؛
– د بندري او سرحدي زیربناوو پراختیا، د مالونو د داخلېدو او وتلو ظرفیت لوړول او د نوی ترانزیتي لارو رامنځته کول؛
– د میلک له لارې د تجارتي وسایطو تګ راتګ زیاتول تر دې چې تر ۱۰۰۰ موټرو پورې په ورځني ډول جریان ولري، د مالونو د جریان د پیاوړتیا او د ګڼه ګوڼې د کمښت په موخه؛
– د اداري او تخنیکي خنډونو حل، کوم چې د تجارت او ترانزیت د بهیر د ورووالي سبب شوي دي.
د لیدنې په پای کې، دواړو خواوو د ګډو ناستو د دوام، د تخنیکي ټیمونو د جوړولو او د توافق شویو موضوعاتو د تعقیب لپاره د ګډ کار پر اړتیا ټینګار وکړ.
همداراز، دواړو لوریو د ګډو ګټو پر بنسټ د اقتصادي همکاریو د پراخولو او د تګ راتګ او تجارت د لا زیاتې اسانتیا ژمنه وکړه.
په دې ناسته کې، د دواړو هېوادونو ترمنځ د تجارتي وسایطو لپاره یوه لنډه او موقتي خاوري لاره هم پرانستل شوه، چې د چارواکو له خوا د افغانستان او ایران ترمنځ د اقتصادي اړیکو د پیاوړتیا او د سوداګرو او پانګوالو لپاره د لا زیاتو اسانتیاوو په لور یو مهم ګام وبلل شو.
دا لیدنه په داسې حال کې ترسره کېږي چې افغانستان له پاکستان سره خپلې تجارتي اړیکې درولې دي او د ګاونډیو هېوادونو سره د بدیلو تجارتي لارو په لټه کې دی.
پای
