ویژه روز– سید عباس عراقچی، د ایران د بهرنیو چارو وزیر چې د یوې رسمي هیأت په مشرۍ کابل ته سفر کړی و، د خپلو مشورتي فعالیتونو په دوام کې له نورالدین عزیزي، د افغانستان د صنعت او سوداګرۍ وزیر سره وکتل.
په دې ملاقات کې دواړو لوریو د ایران او افغانستان ترمنځ د اقتصادي او سوداګریزو اړیکو وروستۍ وضعیت او د دې اړیکو د پراختیا لارو چارو په اړه بحث او تبادله نظر وکړه.
د افغانستان د صنعت او سوداګرۍ وزیر، د ایران او افغانستان ترمنځ د پیاوړو او اوږدمهاله اړیکو، همدارنګه د دواړو ملتونو ترمنځ تاریخي، مذهبي، ژبني او کلتوري اړیکو ته اشاره وکړه او د ایران لخوا په تیرو څو لسیزو کې د میلیونونو افغان کډوالو د میلمه پالنې څخه مننه وکړه.
نورالدین عزیزي د ایران او افغانستان د سوداګریزو اړیکو وروستۍ وضعیت، د اقتصادي اړیکو د ښه کولو اهمیت او د سوداګریزو خنډونو له منځه وړلو په اړه خبرې وکړې او د چابهار بندر د فعالولو او د بندر عباس له لارې د ترانزیت په اهمیت ټینګار وکړ.
هغه د افغانستان کې د ښه پانګونې فرصتونو ته اشاره وکړه او ټینګار یې وکړ چې د افغانستان د صنعت او سوداګرۍ وزارت پدې اراده کې دی چې د تولید په زیاتولو، د اقتصادي او صنعتي وضعیت په ښه کولو او د ایراني شرکتونو پانګونې ته د اسانتیا برابرولو لاره هواره کړي.
په ورته وخت کې، د ایران د بهرنیو چارو وزارت ویلي چې د ایران وزیر په دې ټینګار وکړ چې د دواړو هیوادونو ترمنځ د سوداګریزې او اقتصادي همکارۍ ډیر فرصتونه وپېژندل شي او ترې ګټه پورته شي.
هغه وویل چې ایران د دواړو هیوادونو په مختلفو صنعتي، تولیدي، سوداګریزو، زراعت، ترانسپورت او ترانزیت برخو کې د خصوصي سکتور د فعالیتونو پراختیا ملاتړ کوي.
وروسته له دې، د افغانستان د سوداګرۍ اتاق د ایران او افغانستان د سوداګرو او اقتصادي فعالانو ګډه ناسته د دواړو وزیرانو په ګډون جوړه کړه.
ویژه روز
