شیرانی: لیکل د ټولنې د ټولو قشرونو مسئولیت دی او باید یوازې د ادب په برخه کې محدود نه شي
فوزیه صدیقي – نن په کابل کې د یو شمېر علماوو، پوهنتون استادانو، امارتي او فرهنګي مسئولینو په ګډون علمي–فرهنګي ناسته ترسره شوه. په دې ناسته کې ویناوالو د علم، لیکوالۍ، د جهاد تاریخلیکنې او د هغې د رول په اړه چې اسلامي ارزښتونه راتلونکو نسلونو ته انتقال کړي، ټینګار وکړ.
ضیاءالاسلام شیرانی، د کابل پوهنتون استاد، وویل چې په دین اسلام او د رسول اکرم (ص) په سیرت کې پر علمآموزۍ او لیکلو ځانګړی ټینګار شوی دی.
هغه زیاته کړه چې لیکل د ټولنې د ټولو قشرونو مسئولیت دی او باید یوازې د ادب په برخه کې محدود نه شي.
مولوي عبدالقادر نعماني، د کابل ښاروالۍ د دفتر رئیس، د مجاهدینو تاریخلیکنه د اسلامي فرهنګي او تمدني هویت مهمه برخه وبلله او ویې ویل چې تاریخ باید د اسلامي وحدت، ورورولۍ او ملي ادغام د پیاوړتیا لپاره ولیکل شي.
سید موسی جان آغا، د معارف وزارت د مطبعې رئیس، څرګنده کړه چې زدهکړه او روزنه په ګډه فرهنګ او تمدن جوړوي او که دا دواړه سره یوځای نه شي، ټولنه له جدي ستونزو سره مخ کېږي.
هغه د استادانو پر رول په علمي او اعتقادي روزنه کې ټینګار وکړ.
شیخ نور محمد محبي، د اسلامي بانکدارۍ مشاور، د کتاب لیکل د راتلونکو نسلونو د پوهاوي وسیله وبلله او یادونه یې وکړه چې د اسلام دښمنانو څو ځله هڅه کړې چې علمي او ديني میراث له منځه یوسي.
هغه د مغولو د بغداد برید ته اشاره وکړه او هغه یې د اسلامي علمي میراث پر وړاندې ستره ضربه وبلله.
مهاجر فراهی، د اطلاعاتو او فرهنګ وزارت نشراتي معین، د امید مجتمع اقدام د تېرو شلو کلونو د تاریخ په لیکلو کې وستایه او ټینګار یې وکړ چې د قربانیانو، مبارزو او تحولاتو په اړه باید ژورې او مستندې څېړنې وشي.
عبدالمتین قانع، د داخله وزارت ویاند، علم او پوهه د هېواد د پرمختګ اساسي ډګر وباله او ویې ویل چې ارزشي او تاریخي روایتونه باید په سمه او مستنده بڼه ځوان نسل ته انتقال شي.
عبدالرحمن راشد، د مهاجرینو وزارت معین، ټینګار وکړ چې د افغانانو بریاوې او مبارزې باید د لیکوالانو له خوا ثبت شي څو هېر نه شي. دین محمد حنیف، د اقتصاد وزیر، هم د شوروي ځواکونو د وتلو یادونه وکړه او ویې ویل: «د قلم اغېز کله د تورو څخه زیات وي.»
محمد آقا مسلم، د امید فرهنګي مجتمع رئیس، د دې مرکز اهداف تشریح کړل او ویې ویل چې دا مجتمع په تاریخ، فرهنګ، عقیده او د ماشومانو په روزنه کې فعالیت کوي. هغه زیاته کړه چې شاوخوا ۲۰۰ افغان مېرمنې هم په دې پروګرامونو کې ګډون لري.
دا ناسته د علم، قلم او تاریخلیکنې پر رول د ټینګار سره پای ته ورسېده چې د فرهنګي هویت د پیاوړتیا او اسلامي ارزښتونو د راتلونکو نسلونو ته د انتقال وسیله ده.
پای
